Psalms 96
Ala kava ne'mo agi'ale'mo alino asaga huno ate'niya gemae
1Ala kava nefe'mo saufa yokemo hiyo. Muki ma mopafi vaya'mogimo Ala kava nefeke'mo yokemo hiyo. 2Ala kava nefe'mo yokemo hutetapa agi'ale'mo alitapa asaga hiyo. Lagufamo alino katino late'niye, hutapa muki afina'ae afina'ae'mo aeta hakalo hutapa hapa paiyo. 3Ala agi'amo amitetapae'mo ali'ya'mo ali'niya kava'aenagi lokiya kava'mo hu'niya kava'aenagi huta muki vaya'aife'mo ava gemo hutapa hapa paiyo. 4Ala kava ne'mo mai'niya'mofe'mo mago'e hutapa agi'ale'mo alitapa asaga hiyo. Aigofe goti'apimogimo alagi aeno apakase'niya'mofe'mo agaefeke'mo mago'e hutapa koli nehutapa mono hiyo. 5Muki alu nofi vaya alu nofi vaya'ai goti'apimogimo aigofe gotigi mai'naya'monanafa Ala kava ne'mo'a koku'na'mo alo hu'niye. 6Ha le konali ya'amo hane'nigeno kini vekamo mai'niye. Lokiya vekamo mai'nige'a hapa'ye hu'nige'apae'mo ne'agaya vekamo mai'niye. 7Muki ma mopafi vaya'mogitapae, hu'na, Ala kava ne'mo agi'ale'mo alitapa asaga hutetapa ha le konali ya'ale'e lokiya'ale'efe'mo agi'ale'mo alitapa asaga hiyo. 8Ala agi'amo hane'niya'mofe'mo agi'ale'mo alitapa asaga hutetapa ofalinimo alinita agaetegamo eyo. 9Aote kava'mo nehutapaeke'mo Ala kava nefe'mo mono hiyo. Muki ma mopafi vaya'mogitapamo agaefeke'mo atete hutapa maiyo. 10Muki alu nofi vaya alu nofi vaya'aife'mo, Ala kava ne'mo'a yagaino ne'maiye, hutapa hapa paiyo. Mopamo alino lokiya vaino ateteno male'niyanageno afa'a hanegaiye. Agaemo fatago kava'mo nehuno'ae'mo muki vaya'mo alino fako huno apategaiye. 11Koku'na'mogamo kamogaga aigeno'ao mopamo'e'mo amogaga aino. Solovala ani'moga'e solovala anipi'mo mai'naya ya'mogi'e'mo alopa gefati'mo hute'a apamogaga aiyo. 12Hoyamoga'e hoyafi'mo hane'naya ne'ya'mogi'e'mo lapamogaga aiyo. Yahaofilaga yosamo'a alopa gefati'mo huteno amogaga aigiye. 13Ala kava ne'mo muki ma mopafi vaya'aite'mo yagaino apatesiyafe'mo eminegaiye. Agaemo alagi alagepa fatago kava'mo huno muki ma mopafi vaya'aite'mo yagaino apategaiye.
Copyright information for
KYG